काठमाडौँ- राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर शाहीले वास्तविक मिटरब्याजी सरकार आफैँ भएको आरोप लगाएका छन्।
प्रमुख सचेतक शाहीले जुम्लालगायतका माथिल्लो कर्णालीका निर्माण व्यवसायीको बजेट बैंकमा राखेर सरकारले चर्को ब्याज खाइरहेको उल्लेख गर्दै तत्काल त्यसको निकासा गर्न पनि माग गरे।
बुधबार प्रतिनिधिसभा बैठकमा बोल्दै उनले सो बजेट रोक्का गर्नुको कारणबारे एक हप्ता भित्र संसदमा जवाफ दिन सरकारसँग माग गर्दै जवाफ नआए आफ्नो पार्टीले सदन नै अवरुद्ध पार्ने चेतावनी समेत दिए।
प्रमुख सचेतक सांसद शाहीले भने, ‘सरकारले मिटरब्याजीहरूलाई कारबाही गर्छु भन्छ। वास्तविक मिटरब्याजी यो सरकार हो। पछिल्लो तथ्यांकलाई मात्रै हेर्ने हो भने यो ८ महिनामा चालु खर्च मात्रै सरकारले ५१ दशमलव ४६ प्रतिशत, पुँजीगत खर्च २२ दशमलव १५ प्रतिशत र व्यवस्थापन खर्च ३७ दशमलव ४१ प्रतिशत गरेको छ। पैसा बैंकमा राख्ने, बैंकमा ब्याज खाने अनि मिटरब्याजी अरूलाई भन्ने? वास्तविक मिटरब्याजी कोही छ भने सरकार छ। कर्मचारीले आज तलब खान पाएका छैनन्, आज निर्माण व्यवसायीहरूले पैसा पाएका छैनन्। यसको जवाफ ७ दिनभित्र सम्बन्धित मन्त्रीले दिनुपर्छ। होइन भने हामी सदनमा खडा भएर उभिनेछौँ।’
उनले बैंकमा पैसा राखेर विकास, निर्माणको काम ठप्प पार्ने काम नगर्न पनि सरकारलाई पटकपटक सचेत गराए।
