इनरुवा । सुनसरीको इनरुवामा पाँचौँ करम पूर्व सन्ध्या तथा सांस्कृतिक कार्यक्रम सम्पन्न भएको छ ।
सुनसरीमा बसोबास गर्ने उराँव समुदायले आफ्नो महान् पर्व करम पूजाको अवसरमा पूर्व सन्ध्या तथा सांस्कृतिक कार्यक्रम सम्पन्न गरेको हो ।
नेपाल उराँव आदिवासी जनजाति प्रतिष्ठान इनरुवाको आयोजनामा शनिवार करम पूर्व सन्ध्या कार्यक्रम भव्यताका साथ सम्पन्न गरिएको प्रतिष्ठानका अध्यक्ष बेचन उराँवले जानकारी दिनुभयो ।
भाद्र पूर्णिमाको दिन करम पूजा मनाइने भएकाले त्यस अघि नै जमरा राखेको र सोही जमरा लगाएर करम पूजा सहित सांस्कृतिक कार्यक्रम गरेको जनाइएको छ ।
करम पूजा मनाउन एक हप्ता अगाडि बाजा–गाजा सहित स्थानीय नदीबाट जमरा राख्न बालुवा ल्याइन्छ । सोही विधि अन्तरगत इनरुवाको सुनसरी खोलाबाट बालुवा ल्याएर जमरा राखिएको र शनिबार जमरा लगाएर पुजासगैं पाँचौँ करम पूर्व सन्ध्या तथा सांस्कृतिक कार्यक्रम गरेको उराँवले जानकारी दिनुभयो ।
अध्यक्ष उराँवका अनुसार इनरुवाको प्रतिष्ठानको कार्यालय प्राङ्गणबाट हजार बढीको सङ्ख्यामा उरावहरु आफ्नै मौलिक भेसभुसामा सजिएर र्याली निकालिएको थियो । उराँव समुदायको महान् पर्वको बारेमा जानकारी दिन तथा भाषाको संरक्षण गर्ने र मौलिकता प्रदर्शन गर्ने उद्देश्यका साथ कार्यक्रम सम्पन्न गरेको प्रतिष्ठानका उपाध्यक्ष जयप्रकाश उराँवले बताउनुभयो ।
कार्यक्रमको उद्घाटन गर्नुहुँदै प्रमुख अतिथि सङ्घीय सांसद सिताराम मेहताले उराँवहरुको पक्षमा नेपाली काँग्रेसले २००७ देखी काम गर्दै आएको बताउनुभयो ।
विशेष अतिथि एवम् नेपाली काँग्रेसका केन्द्रिय सदस्य राजीव कोइरालाले उराँव समुदायको महान् पर्वको अवसरमा शुभकामना दिनुहुँदै उराँवहरुको हरेक क्षेत्रमा प्रतिनिधित्वका लागि पार्टी र आफूले योगदान गर्दै आएको बताउनुभयो ।
प्रतिष्ठानका अध्यक्ष बेचन उराँव, उपाध्यक्ष जयप्रकाश उराँव, सचिव रामलाल उराँव, कोषाध्यक्ष सम्पतलाल उराँव, सहसचिव देवप्रकाश उराँव सहित सदस्यहरु दुर्गानारायण उराँव, परमेश्वर उराँव, रिमा उराँव, जयकुमार उराँव, सल्लाहकार नुनुलाल उराँव, वासुदेव उराँव, उराँव अगुवा जयराम उराँव, भूमि उराँव, प्रेमलाल उराँव, लक्ष्मी उराँव, विनोद उराँव, विजय उराँव लगायत उराँवको उपस्थितिमा सन्ध्या कार्यक्रम गरिएको थियो ।
कार्यक्रममा भारतको झारखण्डको राची विश्व विद्यालयका प्राध्यापक महेश भगत सहित पाँच जनालाई सम्मान गरिएको थियो ।
