बलिउड अभिनेता आमिर खान पछिल्लो समय फिल्म ‘लाल सिंह चड्ढा’ मा देखिएका थिए। यो फिल्म बक्स अफिसमा फ्लप भएपछि उनी कुन फिल्ममा देखिन्छन् भनेर कौतुहलता छ।
यसैबीच उनले फिल्ममा कमब्याक गर्ने लागेको खबर बाहिरिएको छ। भारतीय सञ्चारमाध्यम नवभारत टाइम्सका अनुसार उनको आगामी फिल्म सन् २०२४ को क्रिसमसमा रिलिज हुनेछ। हालसम्म फिल्मको नाम तय भएको छैन।
आमिरकै प्रोडक्सन हाउसबाट बन्ने फिल्मको अहिले प्रि-प्रोडक्सनको काम भइरहेको छ। फिल्मको छायांकन सन् २०२४ जनवरीदेखि सुरू हुने बताइएको छ।
उनको पछिल्लो फिल्म ‘लाल सिंह चड्ढा’ बक्स अफिसमा फ्लप सावित भयो। अद्वैत चन्दनले निर्देशन गरेको फिल्ममा उनीसँगै करीना कपूर खानको मुख्य भूमिका छ।
यो फिल्म हलिउड फिल्म ‘फरेस्ट गम्प’ को आधिकारिक हिन्दी रिमेक हो। जसमा टम ह्याक्सले मुख्य भूमिका निभाएका थिए।
यसअघि आमिरको फिल्म ‘ठग्स अफ हिन्दोस्तान’ पनि बक्स अफिसमा असफल भएको थियो। लगातार दुई फिल्म फ्लप भएपछि आमिरले समय लिएर फिल्ममा काम गर्ने बताएका थिए।
