इनरुवा । सुनसरीको बराहक्षेत्र नगरपालिका ९ राजाबासस्थित युवतीहरूमाथि कुटपिट गर्ने तीनजनालाई सुनसरी प्रहरीले पक्राउ गरी सार्वजनिक गरेको छ ।
जिल्ला प्रहरी कार्यालय सुनसरीका प्रवक्ता, डीएसपी राजकुमार राईले युवतीहरूबीच भएको कुटपिटमा संलग्न तीनजनालाई पक्राउ गरी सार्वजनिक गरिएको जानकारी दिए ।
असार २९ गते साँझ ५ बजेतिर भएको घटनामा बराहक्षेत्र १० की १९ वर्षीया प्रीति लिम्बू, बराहक्षेत्र ८ की १९ वर्षीया दुर्गा राई र सोही वडाकी २२ वर्षीया विनिता उराँवलाई पक्राउ गरिएको हो ।
जसमध्ये लिम्बूलाई सोही दिन र राई र उराँवलाई मंगलबार इटहरीबाट पक्राउ गरिएको डीएसपी राईले बताए ।
बराहक्षेत्र ९ बस्ने १९ वर्षीया मनीषा राईसहित तीनजनाले प्रहरीमा उजुरी दिएको र कुटपिट गरेको भिडियोसमेत सामाजिक सञ्जालमा भाइरल बनेपछि प्रहरीले तत्काल फरार रहेका उनीहरूको खोजी कार्य अगाडि बढाएको थियो ।
अझै दुईजना फरार रहेकाले उनीहरूको पनि खोजी भइरहेको सुनसरी प्रहरीले जनाएको छ । प्रहरीका अनुसार कुटपिट गर्ने समूहका १९ वर्षीया सञ्जिता राई र निहाङ राईको खोजी भइरहेको छ ।
उनीहरूको समूहले आफ्नो ब्वाइफ्रेन्डसँग बोलेको भन्दै बराहक्षेत्र ८ की १७ वर्षीया सन्ध्या परियार, १६ वर्षीया नवीना विश्वकर्मा र १९ वर्षीया मनीषा राईलाई निर्घात कुटपिट गरेको भिडियो सामाजिक सञ्जालमा भाइरल बनेको थियो ।
पक्राउ परेका तीनैजनामाथि अभद्र व्यवहार मुद्वामा जिल्ला अदालत सुनसरीबाट म्याद थप गरी इलाका प्रहरी कार्यालय महेन्द्रनगरमा राखेर आवश्यक अनुसन्धान तथा कारबाही भइरहेको प्रहरीले बताएको छ ।
