कार्तिक १६ गते,सुनसरी । मंसिर ४ गतेको निर्वाचनका लागि मनोनयन दर्ता भएसँगै सुनसरीमा चुनावी माहोल ह्वात्तै बढेको छ । चियापसल, सार्वजनिक यातायात, पार्कदेखि मानिसको जमघट हुने हरेक ठाउँमा चुनावकै विषयमा कुराकानी हुने गरेको भेटिन्छ । अहिले चुनावी गफ नहुने ठाउँ छैन ।
व्यापारीदेखि किसानसम्म कुन क्षेत्रमा कसको उम्मेदवारी ?, कुन पार्टी र उम्मेदवार कस्तो ? उनीहरूले विगतमा गरेका काम ?, चुनाव कसले जित्ला ? प्रश्नसहितका विषयमा पक्ष विपक्षमा चुनाव केन्द्रित कुराकानी भइरहेको सुनिन्छ ।
यसैबीच सुनसरीको प्रतिनिधिसभा अर्थात् संघीय निर्वाचन क्षेत्र नम्बर २ मा सत्तारुढ गठबन्धन दलबाट साझा उम्मेदवारका रूपमा नेपाली काँग्रेसका सिताराम मेहता र नेकपा एमालेकातर्फबाट एमालेका नेता भिम प्रसाद आचार्य प्रतिस्पर्धा गर्दै छन् । मेहता यसअघि भएको दुई पटकको निर्वाचनमा यही क्षेत्रबाट जितेको तथा पूर्व राज्यमन्त्री हुन् भने र आचार्य नेकपा एमालेका केन्द्रीय सदस्य एवं प्रदेश १ का पूर्वमूख्यमन्त्री हुन् ।
यो निर्वाचन क्षेत्रमा यी दुई उम्मेदवारसँगै अन्य राजनीतिक दलका र स्वतन्त्र सहित उम्मेदवारहरु चुनावी मैदानमा छन् । यो क्षेत्रमा मुख्य प्रतिस्पर्धा भने सत्ता गठबन्धन दल र एमालेबीच नै हुने देखिन्छ । आफूले अत्यधिक मत ल्याएर जित्ने दुवै उम्मेदवारको दाबी छ । सुनसरी–२ मा नेपाली काँग्रेस सहितको गठबन्धनका उम्मेदवार सिताराम मेहता २०६२।०६३ को जनआन्दोलनपछि यही क्षेत्रबाट निरन्तर २ पटक सम्म प्रतिनिधिसभाको सदस्यमा निर्वाचित बनेका थिए ।
तेस्रो पटक चुनावी भिडन्तमा रहेको नेपाली काँग्रेसका अग्रज नेता सिताराम मेहतालाई सुनसरीमा विकास र समृद्धिको जग बसाल्ने नेताको रूपमा चिनिन्छ ।
त्यस्तै नेपाली काँग्रेस सहित नेकपा माओवादी केन्द्र, नेकपा एसको साझा उम्मेदवार सिताराम मेहतालाई सुनसरी–२ उम्मेदवारको टिकट दिएपछि चुनावमा जित सुनिश्चितताका लागि सक्रिय रूपमा होमिसकेका छन् । उनी सत्ता गठबन्धन दलका उम्मेदवारका लागि मुख्य प्रतिस्पर्धीका रूपमा चुनावी मैदानमा देखिएका छन् । सुनसरी–२ मा विगतमा भन्दा यो पटक निकै प्रतिस्पर्धा हुने कतिपयको बुझाइ छ । जातिय र भूगोलको हिसाबले एमालेका उम्मेदवार भिमप्रसाद आचार्यको भन्दा अधिकांश क्षेत्रमा काँग्रेसकै उम्मेदवार सिताराम मेहताको बढी प्रभाव रहेको जानकारहरू बताउँछन् । त्यसैको फाइदा उम्मेदवार सिताराम मेहताले लिन सक्ने उनीहरूको अनुमान छ ।
कसको सम्भावना कति ?
सुनसरीमा सक्रिय ठूला दलमध्येका तिन दल कांग्रेस, माओवादी केन्द्र र नेकपा एस सहितको गठबन्धन दल एकातिर र एमाले– जसपा चुनावी मैदानमा छन् । अघिल्लो २०७४ सालको निर्वाचन र गत स्थानीय तहको निर्वाचनमा प्राप्त मत आधार हेर्दा एमाले सुनसरी क्षेत्र न.ं –२ मा निकै कमजोर देखिन्छ ।
२०७४ मा सँगै मिलेर चुनाव लडेको दल माओवादी केन्द्र अहिले एमालेको विपक्षमा छ । यो क्षेत्र नेपाली काँग्रेस, नेकपा माओवादी र एमालेसँग अलग भएको नेकपा एसको पकड क्षेत्रसमेत मानिन्छ । यो क्षेत्रबाट विगतको निर्वाचनमा गठबन्धन दल कांग्रेसका उम्मेदवारले जित्दै आएको छ । पछिल्ला २०७० र ०७४) को निर्वाचन र दुई स्थानीय निर्वाचनमा यी नेपाली काँग्रेसकै उम्मेदवारले जितेका छन् ।
त्यसैले योपटकको निर्वाचनमा गठबन्धन दल नेपाली काँग्रेसकै उम्मेदवार सिताराम मेहताले विजय हुने निश्चितप्रायः देखिन्छ । २०७४ को निर्वाचन जस्तो अहिले एमालेमा बलियो जनाधार देखिँदैन । त्यस्तै गत स्थानीय तहको नतिजा हेर्ने हो भने स्थानीय सरकारमा एमालेको बलियो पकड पनि छैन । यो क्षेत्रमा गठबन्धन बलियो देखिन्छ ।
एमाले भन्दा गठबन्धन बलियो
सुनसरी क्षेत्र न.ं २ मा इटहरी उपमहानगरपालिकाको वडा न.ं १, २, ३, ४, ५, १६, १७, १८, १९,२० रामधुनी नगरपालिकाको वडा न.ं १, २, ३, ५, ८, ९ इनरुवा नगरपालिकाको वडा न.ं १, २, ५, ६, ९, १०, देवानगंज गाउँपालिकाको सबै वडा र हरिनगरा गाउँपालिकाको वडा न.ं ३ सम्म यो निर्वाचन क्षेत्रमा पर्छ । यो क्षेत्रमा पर्ने अधिकाँश स्थानीय तहमा गठबन्धन दलकै नेतृत्व छ ।
गत प्रतिनिधी सभाको निर्वाचनमा कांग्रेसले यो क्षेत्रबाट एक्लै चुनाव जितेको थियो । यो दुवै निर्वाचनमा एमालेका उम्मेदवार पराजित भएका थिए । ०७४ मा एमाले र माओवादी तालमेल गरेर चुनाव लड्दा पनि काँग्रेसकै उम्मेदवार सिताराम मेहता बिजयी भएका थिए ।
यस पटक गठबन्धनका उम्मेदवार सिताराम मेहताको जितका लागि नेकपा माओवादी केन्द्रको मतको महत्व छ । यो चुनावमा माओवालीका तर्फबाटअन्तरघात हुने कुनै सम्भावना नरहेको नेकपा माओवादी केन्द्र सुनसरीका अध्यक्ष योगेन्द्र प्रसाद मण्डलले बताएका छन् । एमाले पार्टी परित्याग गरी माओवादी प्रवेश गरेका इटहरीका पूर्व मेयर तथा माओवादी नेता द्धारिकलाल चौधरी समेत सोही क्षेत्र प्रदेश ‘क’ तर्फका उम्मेदवार भएपछि सिताराम मेहतालाई सहज भएको अर्काथरीको अनुमान छ । आफ्ना लागि यो क्षेत्र जित्न खासै चुनौतीपूर्ण नहुने सिताराम मेहताको पनि बुझाइ छ । तर यो क्षेत्रबाट गठबन्धनको भारी मतको बाबजुत आफू विजय हुने एमालेका उम्मेदवार आचार्यको दाबी छ । एमालेका उम्मेदवार आचार्यले चुनाव जित्न एमालेको मात्रै मतले भने पुग्ने देखिदैन । उनले जित्नका लागि अन्य दलको मत लिनैपर्ने हुँदा सहज भने देखिँदैन ।
यसैगरी सुनसरी प्रतिनिधि सभा निर्वाचन क्षेत्र नम्बर २ का उम्मेदवार सिताराम मेहतालाई यस क्षेत्रका मतदाताले खास धन्यवाद दिन थालेका छन् ।
नेपाली काँग्रेसबाट सुनसरी क्षेत्र न.ं २ को प्रतिनिधी सभा सदस्यमा मनोनयनपछि मतदाताको प्रारम्भिक आशय बुझ्न यस क्षेत्र भित्र रहेको इटहरी उपमहानगरपालिका, रामधुनी नगरपालिका, इनरुवा नगरपालिका, हरिनगर गाउँपालिका र देवानगंज गाउँपालिकाको केही वडामा पुगेका सिताराम मेहतालाई मतदाताले फेरी एक पटक सांसद भएको हेर्न चाहेका छन । सिताराम मेहता उम्मेदवार रहेको निर्वाचन क्षेत्रमा जहाँ मेहताको पहलमा दर्जनौँ विकास निर्माणका योजना सम्पन्न भएका छन । यस क्षेत्रका विभिन्न सडकको कालोपत्रे र ढलान गरिएको छ । सिंचाई र ढल निकासमा पनि सिताराम मेहताको योगदान छ । यस क्षेत्रका भित्रि सडक कालोपत्रे भएपछि धुलोबाट सर्वसाधरणले मुक्ति पाएका छन ।
सिताराम मेहताले भेटेको अधिकांश मतदाताले आफुहरुले यस्तै विकासको नेतृत्व गर्ने नेता खोजेको भन्दै फेरी एक पटक सांसद भएर अधुरा काम पुरा गर्न सुझाव दिए । सिताराम मेहताले आफ्नो पाँच वर्षे कार्यकालमा कुनै विवादमा आउने काम गरेनन् । जनताकै कुरा सुन्ने । उनीहरुको योजनामा बजेट ल्याउन प्रयास गर्नमा सिताराम मेहताले आफ्नो पाँच वर्ष खर्च गरे ।
आफ्नो दल र अरुको दल भनेर कहिल्यै पनि विभेद गर्ने काम यो पाँच वर्षमा गरेनन् । त्यसैको फलस्वरुप सुनसरी क्षेत्र न.ं २ का मतदाता उनको पक्षमा खुलेरै लागेका छन् ।
सिताराम मेहताको लोकप्रियता देखेर केही बिपक्षी दलका नेताहरुले चुनाव हार्ने डरले स्थानीय दुई चार जना युवाहरु लगाएर मेहताको बिरोध समेत गर्न थालेको यस क्षेत्रका मतदाताको कथन छ ।
