इटहरी । इटहरी उपमहानगरपालिकाले खोला–पैनी मिचेर बनाएका भौतिक संरचना भत्काउन ३५ दिनको उर्दी जारी गरेको छ । ३५ दिनभित्र नभत्काए उपमहानगरपालिकाले डोजर चलाएर भत्काउने चेतावनी दिएको छ । 
सुरुमा इटहरीस्थित टेंग्रा खोला,खेती खोला र सुकुमारी पैनीको क्षेत्राधिकार भित्रको जग्गा खाली गर्न मेयर हेमकर्ण पौडेलले ३५ दिने सुचना सार्वजनिक गरेका छन् । टेंग्रा खोला, खेती खोला र सुकुमारी पैनीको दुवै किनारबाट ६–६ मिटर छोडेर मात्र भवन बनाउन उपमहानगरपालिकाले जारी गरेको सुचनामा भनिएको छ । 
इटहरीमा खोला, पैनी तथा सार्वजनिक जग्गाहरु मिचेर धेरै ठाउँमा घर बनाइएका छन् । जसको कारण वर्षामा पानीको सहज निकास नहुँदा बाढीले इटहरी चोक र आसपासका वस्ती डुबाउने गरेको छ । अतिक्रमण हटाउन सकेमात्र पनि इटहरीको डुबान धेरै हदसम्म नियन्त्रणमा आउने सम्भावना छ । 
मेयर पौडेलले इटहरीलाई बाढीमुक्त बनाउनको लागि धेरै कामहरु अघि बढेको भन्दै खोला, पैनी मिचेर बनाएका संरचना भत्काउने अभियान पनि सँगै सञ्चालन गरिने बताएका छन् । उनले योसँगै सार्वजनिक ऐलानी जग्गाको संरक्षणसमेत व्यवस्थित तरिकाले सुरु गरिने बताएका छन् ।
उपमहानगरपालिकाले यसअघि कोशी राजमार्गमा पर्ने घरहरुसमेत भत्काएको थियो भने सडकलाई पार्किङ निषेध घोषणा गरी प्रभावकारी कार्यान्वयन गरिरहेको छ ।
