इनरुवा । भारतीय सुरक्षाकर्मीको रुपमा १८ वर्ष काम गरेर फर्किनुभएको रामधुनी नगरपालिका ७ का कृपाश्वर घले गुरुगंले ड्रागन फल खेतीबाट बार्षिक करोडको आम्दानी गर्न थाल्नुभएको छ । अवकास प्राप्त गरेपछि स्वदेशमा केही काम र सेवा गर्ने उदेश्यले गुरुगंले मलेसियन प्रजातीको १३० विरुवाबाट ड्रागन फल खेती सुरु गर्नुभएकोमा हाल एक हेक्टरमा विस्तार गर्दा बार्षिक एक करोडको आम्दानी गर्न थाल्नुभएको हो ।
गुरुगंले आफ्नो १० लाख रुपियाँ र कृषि ज्ञान केन्द्रको सात लाख रुपियाँ अनुदानमा थाल्नुभएको ड्रागन फल खेतीबाट उत्पादन भएको फल र बेर्ना विक्रिबाट बार्षिक एक करोडको आम्दानी गर्न सफल भएको बताउनुभएको छ । अहिले सामाजिक सञ्जाल र सञ्चार माध्यमका कारण धेरैले जानकारी पाएका र व्यावसायिक खेतीमा पनि हात हालेकोमा आफू जिल्लाको अग्रज ड्रागन फल खेतीको किसान भएको गुरुगंको दावी रहेको छ । ड्रागन फल खेतीमा हाल हाल्दा सुरुमा चुनौती होलाकी लगानी डुब्लाकी भन्ने भान थियो तर लगानी गरेपछि पाँच वर्षमा नै सोचे भन्दा राम्रो आम्दानी गर्न फसल भएको सुनाउनुभयो । तर्जुमा ड्राइगन फ्र्ट कृषि फर्मको नामबाट ड्रागन फल खेती गर्नुभएको हो ।
किसान गुरुगंका अनुसार खेतबाटै ड्रागन फल लिन व्यपारी आउने गरेको र यसको बजार इटहरी, विराटनगर सहित काठमाण्डौसम्म रहेको छ । सुरुमा प्रति केजी ७०० रुपियाँसम्ममा विक्रि गरेकोमा अहिले खेतबाटै ४०० रुपियाँ प्रतिकेजीमा विक्रि भईरहेको जानकारी दिनुभयो । फलले मात्रै बार्षिक करोड नभएको तर बेर्नाको माग अत्याधिक भएकाले नसर्रीबाट समेत गरेर राम्रो आम्दानी भएको सुनाउनुभयो ।
त्यसैगरी रामधुनी नगरपालिका ७ बक्लौरीका कृषक कृष्ण घलेले पनि १० कट्ठाबाट सुरु गर्नुभएको ड्रागन फल खेती एक विघा १० कठ्ठामा विस्तार गर्नुभएको छ । यही खेतीबाट बार्षिक २५ लाख रुपियाँ आम्दानी गर्न थालेको बताउनुभएको छ । घलेले तमु कृष्ण बहुउदेशीय कृषि फर्म संचालन गरेर ड्रागन फल खेती गर्नुभएको हो ।
कृषि ज्ञान केन्द्र सुनसरीका प्रमुख निलकमल सिंहका अनुसार घले र गुरुगं सहित सात जनाले जिल्लामा व्यवसायीक रुपमा ड्रागन फल खेती गर्नुभएको छ । त्यसमध्ये चार वटा रामधुनी ७ बक्लौरीमा रहेको र अन्य बराहक्षेत्र, हरिनगर सहितको ठाउँमा रहेको जानकारी दिनुभयो । कृषिमा सात वटा फर्महरुले व्यवसायीक रुपमा ड्रागन फल खेती गरिरहेको तथ्यांक रहेको सिंहले बताउनुभयो ।
उता सीमावर्ती हरिनगर गाउँपालिका ३ गौतमपुरका कृषक अन्जली मेहताले पनि १० कट्ठामा ड्रागन फल खेती सुरु गर्नुभएको छ । यही खेतीबाट बार्षिक १५ लाख रुपियाँ आम्दानी गर्ने अपेक्षा गरेको मेहताले बताउनुभएको छ ।
यही व्यवसायबाट किसानहरुको घर व्यवहार, बच्चाहरूको शिक्षादीक्षा, पाहुनापाछाको सत्कार, सामाजिक व्यवहार चलेको छ । ड्रागन फलको सफलताबाट धेरै खुशी भएको र आनन्द र सन्तुष्टि पनि मिलेको उनीहरुको कथन छ ।
पाकेको ड्रागन फललाई लामो समयसम्म सामान्य तापक्रममै भण्डारण गर्न सकिने हुनाले पनि यसको बजार सम्भावना बढेको र प्रशस्त मात्रामा भिटामिन र मिनरल हुने ड्रागन फलमा क्यान्सर प्रतिरोधी गुण हुने विज्ञहरूले बताएका छन् ।
