इनरुवा । सुनसरीको रामधुनी नगरपालिका वडा नम्बर ८ स्थित पौडेल चौकमा एक महिलामाथि सामुहिक रुपमा निर्घात कुटपिट भएको छ ।
चार जना बयस्क व्यक्ति र एकजना नावालकसमेत मिलेर महिलामाथि कुटपिट गरेको भिडियो सामाजिक सञ्जालमा सार्वजनिक भएको छ । स्थानीय सन्तोस शाह र उनको परिवार मिलेर यादव समुदायीकी एक महिलामाथि कुटपिट गरेको भिडियोमा देखिन्छ ।
घटना मंगलबार दिउँसो ११ बजेतिरको हो । पीडित महिलालाई घरमा एक्लै भएको बेलामा घरभित्रै कुटपिट गरेर बाहिर ल्याएरसमेत कुटपिट गर्न थालेपछि छिमेकीले भिडियो खिचेका थिए ।
स्थानीय प्रहरी चौकी डुम्राहाका प्रहरी सहायक निरीक्षक सनम राजवंशीका अनुसार उनीहरुबीच पटक–पटक झैझगडा भइरहने र प्रहरीकोमा पुगेर मेलमेलापसमेत हुने गरको थियो । ‘दुईतिन पटक त चौकीमा पनि आएर झगडा नगर्ने भनेर गए । एक पटक जिल्ला प्रहरी कार्यालय सुनसरी पनि पुगेका थिए । सायद त्यहाँ मेलमेलापको कागज गरेर आए । तर, जहिल्यै झगडा गरिरहन्थेँ ।’ राजवंशीले भने ।
कुटपिट गर्ने शाहले समुदायमा अन्य व्यक्तिहरुसँगसमेत झगडा गर्ने गरेको स्थानीय बताउँछन् । उनलाई बुधबार नै प्रक्राउ गरेर जिल्ला प्रहरी कार्यालयमा राखिएको र घटनाबारे थप अनुसन्धान भइरहेको प्रहरीले जनाएको छ ।
