माघ २९ गते, इनरुवा । इनरुवा नगर प्याब्सनले फागुन-२ गते सरस्वती पूजाको दिन विद्यार्थीहरुलाई अनिवार्य विद्यालय पोशाकमा विद्यालय आउँन आग्रह गरेकाे छ ।
इनरुवा नगर क्षेत्रभित्र रहेकाे सम्पूर्ण प्याब्सन सदस्य विद्यालयहरुमा विद्यार्थीले अनिवार्य विद्यालयकाे पोशाकमा आउनुपर्ने र विद्यालयकाे पाेशाक भन्दा फरक पोशाक लगाई विद्यालय प्रवेश गर्न नपाउने भनी नगर प्याब्सन इनरुवाले निर्णय समेत गरेकाे छ ।
विगत केही वर्षदेखि बालबालिकाहरूमा पूजाआजामा भन्दा तडकभडकमा बढी ध्यान गएको र विद्यार्थीहरूमा देखिएको सोचाइको भिन्नतालाई एकरूपतामा बदल्न तथा विद्यार्थीहरू बीचको समानता कायम गर्ने उद्देश्यले यस वर्षदेखि सरस्वती पूजाको दिन सबै विद्यालयका विद्यार्थीहरूले आफ्नो विद्यालयको विद्यालय पोशाकमा नै विद्यालयमा उपस्थित भई सरस्वती देवीको पूजाआजा गर्नु गराउनु पर्ने इनरुवा नगर प्याब्सनका अध्यक्ष रमेश प्रसाद गुरागाईंले जानकारी दिनुभयो ।
अध्यक्ष गुरागाईंले विद्यालयको पोशाक भन्दा फरक पोशाक लगाई विद्यालय प्रवेश गर्न नपाउने भनी नगर प्याब्सन इनरुवाले निर्णय गरेकोले आफ्ना नानीबाबुहरूलाई फागुन २ गते सरस्वती पूजाको दिन आफ्नो विद्यालयको पोशाकमा नै विद्यालय पठाउनुहुन सम्पूर्ण अभिभावक ज्यूहरुमा अनुराध समेत गर्नुभयो ।
राष्ट्रिय बजरंग दल इनरुवा नगर कार्यसमिति सुनसरीले सरस्वती पूजाकाे महत्त्व,हाम्रो परम्पराकाे संरक्षण गर्ने यसको मूल मर्म अनुसार पूजा आजामा समर्पित हुनुे उदेश्यले इनरुवा नगर प्याब्सनलाई सरस्वती पूजाको दिन विद्यार्थीहरुलाई विद्यालय पोशाकमा विद्यालय बाेलाउन पत्र नै बुझाएकाे थियाे । उक्त पत्र पाएपछि इनरुवा नगर प्याब्सनले गरेकाे निर्णयलाई स्वागत गर्दै राष्ट्रिय बजरंग दल इनरुवा कार्यसमिति सुनसरीले इनरुवा नगर प्याब्सनलाई धन्यवाद तथा आभार प्रकट गरेकाे छ ।
