बैशाख १९ गते,इनरुवा । इनरुवा नगरक्षेत्रमा बसोबास गरि व्यापार व्यवसाय गर्दै आएका मारवाडी समुदायका युवाहरुले आफ्नै समुदायको पसलमा स्वेच्छिक दान–पात्र राखेर समाजसेवा गर्दै आएका छन ।
इनरुवा बजारमा रहेका हरेक मारवाडी समुदायका पसलमा मारवाडी युवा मञ्च इनरुवा नगर कार्य समितीले सामाजिक सेवार्थ टिनको बाकसमा ताला लगाएर दान–पात्र राखि रकम संकलन गरेर सामाजसेवा गर्न थालेको हो ।
मारवाडी युवा मञ्च इनरुवाका अध्यक्ष आन्नद चित्लाङ्गीयाका अनुसार हरेक मारवाडी समुदायका पसलमा दान–पात्रको बाकस राखिएकाले सवैले दैनिक, हप्ता वा मासिक रुपमा स्वेच्छाले रकम दिने गरेका छन ।
६ महिना अगाडिबाट राखिएको दान–पात्रको बाकस एकवर्षमा अनिवार्य खोल्ने योजना रहेपनि रकमले भरिएको अवश्थामा वा सामाजिक सेवाका लागि रकम आवश्यकता परेको खण्डमा खोल्ने मारवाडी युवा मञ्चको नीतिअनुसार राखिएको छ ।
प्रत्येक मारवाडी समुदायका सवै उमेर समुहका व्यक्तिहरुले आफ्नो इच्छा अनुसार आम्दानी वापतको केही रकम उक्त दान–पात्रको बाकसमा दिने गरेका छन ।
बजारका पसलमा राखिएका प्रत्येक बाकसमा नम्बर राखी ताला लगाएर युवामञ्चले चावी राख्ने गरेको छ ।
इनरुवा १ स्थित शान्तीचोकमा खाद्यान्नको व्यापार व्यवसाय गर्दै आएका फणिभुषण पंचारियाले मुख्य पेशा व्यापार व्यवसायमा केन्द्रीत रहेका मारवाडी समुदायले समाजमा विभिन्न माध्यमबाट योगदान दिदै आएकोमा मारवाडी युवा मञ्चले आम्दानी अनुसार प्रत्येक पसलबाट स्वेच्छिक रुपमा रकम दान–पात्रमा दिनुपर्ने अभियान थालनी गरेर असल कामको सुरुवात गरेको बताए ।
युवा मञ्चका अध्यक्ष चित्लागियाले मारवाडी युवा मञ्च स्थापना भएपछि अनाथ आश्रममा खाद्यन्न सहयोग, फागु पुर्णिमामा रड्ड उत्सव, विभिन्न समयमा पिउने पानी वितरण, रक्तदान तथा वृक्षारोपण कार्यक्रम, मठमन्दिर सरसफाई तथा रड्डरोगन, गरिब विपन्न असाहयलाई सहयोगलगायतका सामाजिक सेवाका कार्य गर्दै आएको बताए ।
इनरुवामा रहेका मारवाडी युवाहरु प्रत्येक महिना एकपटक भेला भएर बैठक बसि सामाजिक सेवाका योजनाहरु बनाएर विभिन्न प्रकारका सेवामुलक कार्यहरु गर्दै आएका छन ।
श्राेत : वर्णमाला दैनिक
