असाेज १६ गते,झापा । मंगलबार साँझ मेचीनगर –७, एनएमसी डेरी अगाडि पूर्वपश्चिम राजमार्गमा एउटा भारतीय कारमा अचानक आगलागी हुँदा आगो निभाउन गएको दमकल दुर्घटनामा परेको छ।साँझ साँढे ६ बजे काँकरभिट्टाबाट धुलाबारीतर्फ आउँदै गरेको डब्लुबी ७४ एआर ७१५० नम्बरको भारतीय कारको इन्जिनबाट अचानक आगलागी भएको थियो।
कारमा लागेको आगोलाई मेचीनगर नगरपालिकाको एउटा दमकल, नेपाल प्रहरी, सशस्त्र प्रहरी बल र स्थानीयको सहयोगमा साँझ ७ बजे तिर पूर्ण रुपमा नियन्त्रणमा आएको प्रहरीले जनाएको छ।कारमा अचानक आगलागी भएपछि सो आगो निभाउन जाँदै गरेको बिर्तामोड नगरपालिकाको दमकल दुर्घटनामा परेको थियो।
अर्जुनधारा नगरपालिका– ११ गिरीबन्धु टि इस्टेटस्थित पूर्वपश्चिम राजमार्गमा बिर्तामोडबाट चारआलीतर्फ जाँदै गरेको अर्जुनधारा– ७ बस्ने मोहनप्रसाद भेटवालले चलाएको मे १ त ४१३८ नम्बरको बिर्तामोड नगरपालिकाको फोहोर उठाउने ट्रयाक्टरलाई सोही दिशाबाट जाँदै गरेको भद्रपुर नगरपालिका ६ बस्ने बर्ष अन्दाजी ४७ का मनोज पौडेलले चलाएको मे १ ग ४१ नम्बरको बिर्तामोड नगरपालिकाकै दमकलले ओभरटेक गर्न खोज्दा ट्रयाक्टरलाई ठक्कर दिएको हो।
दमकल चालक पौडेललाई नियन्त्रणमा लिएको इलाका प्रहरी कार्यालय बिर्तामोडले जनाएको छ। दमकलका चालकसहितका कर्मचारीले मादक पदार्थ सेवन गरेका कारण दमकल ट्रयाक्टरमा ठोक्किएको बताइएको छ।
