इलाम । आफ्नो प्रेमीलाई भेट्न आएकी एक महिलालाई अर्के व्यक्तिले बलात्कारको प्रयास गरेको पाइएको छ ।
बिश्वकर्मा पूजाको दिन इलाम आएकी युवती प्रेमीको कोठामा बसिरहेका बेला पोखरेलले बलात्कारको प्रयास गरेको बताइएको छ । पीडितले जाहेरी दिएपछि प्रहरीले अनुसन्धान गरेको थियो । प्रहरीले पीडितको बयान र स्वास्थ्य जाँच गरी जिल्ला अदालतमा पेश गरे पनि अदालतले म्याद थपको अनुमति दिएको छैन ।
घटनाको अनुसन्धान गरी म्याद थपको अनुमति मागेको र अनुमति पाउने बित्तिकै थप अनुसन्धान गर्ने प्रहरीले जनाएको छ ।
युवतीलाई बलात्कार प्रयास गर्ने प्रभु बैंकका कर्मचारी प्रमेश पोखरेल दैनिक मातेर बैँक पुग्ने गरेकोसमेत पाइएको छ । बैंकको विराटनगर शाखामा पनि पोखरेलले रक्सीको नसामा हर्कत गरेपछि इलाम सरुवा गरिएको थियो । सँधै पनि बैंकमा दैनिक रक्सीमा लठ्ठ परेर आउने गरेको र घटना भएको दिनमा पनि मातेर नै बैंकमा पुगेको पाइएको छ ।
युवतीको प्रेमी र पिडक दुबै बैंकका कर्मचारी हुन् । प्रेमीसँगै खाना खाएका बेला पिडकले युवतीलाई देखेका थिए । खाना खाएको केही घण्टापछि साथीको कोठामा पिडक पुगेका थिए ।
यो घटना असोज २ गते दिउँसो साढे ३ बजेको हो । डेरा बस्दै आएका प्रेमीको कोठामा युवती बसेकी थिइन् । युवतीको प्रेमी पनि इलाम सदरमुकाममा रहेको अर्को बैंकका कर्मचारी हुन् । युवती बसेको कोठामा जानु अघि पिडक उनको प्रेमीले काम गर्ने बैंकमा पुगेका थिए ।
बैंकमा पुगेका बेला युवतीका प्रेमी काममा व्यस्त थिए । त्यसलगत्तै निस्किएका प्रभु बैंकका ती कर्मचारी बैंकको ड्रेसमा युवती भएको कोठामा पुगेका थिए । उनी मोबाइल चार्ज गर्ने नहुँमा युवती बसेको कोठामा पुगेको पिडितले बताइन् । युवतीले भनिन–‘ढोका खोलेपछि सर त हुनुहुन्न भने, तर म आराम गर्छु भनेर भित्र पसे र ढोका बन्द गरे ।’
त्यसपछि ढल्किएर बसेका उनले मेरो मोबाइल खोसेर फ्याकिदिए र मेरो काखमा एक्कासी आएर कपडा खोल्ने प्रयास गरे । मदिराले लठ्ठ परेका पिडकले सुरुमा लुगा खोल्न लगाएको तर नमानेपछि लछारपछार पारेको उनी बताउँछिन् ।
जबरजस्ती लडाएर आधि लुगा खोलेपछि उनको टाईमा पक्रिएर आँफू भागेको पीडित युवतीको भनाइ छ ।
‘त्यसपछि म ढोका खोल्न सफल भएर बाहिर निस्केँ । त्यसको १० मिनेटपछि प्रेमी आइपुगे । त्यसपछि के गर्ने भन्ने सल्लाह गर्दागर्दै रात पर्यो र भोलिपल्ट असाज ३ गते बिहान प्रहरी कार्यालय पुगेर जाहेरी गरेका हौँ ।’
पीडितले प्रहरी कार्यालयमा जाहेरी दिएपछि प्रहरी पिडकको कोठामा पुगेको थियो । प्रहरीले पिडकको कोठाबाट युवतीको कोठामा पुग्दा लगाएको बैँकको ड्रेस बरामद गरेको छ । कोठाबाट चुरोट र रक्सीका बोतलहरु पनि प्रहरीले फेला पारेको छ ।
घटनालाई सामसुम बनाउन पीडितका अभिभावकलाई पिडकका आफन्त पनि पुगेका छन् । ‘धेरैजनाले घटना बाहिर नल्याइदिन अनुरोध गर्नुभएको छ, तर मैले हामीले मानेका छैनौँ ।’
घटनाको मिलापत्र गर्न र बाहिर नल्याइदिन पीडितको प्रेमीलाई पिडकका आफन्त र साथीले आग्रह गर्दै आएका छन् ।
राजधानी दैनिकबाट
