साउन -९ गते कानेपोखरी ।नेकपा माओवादी केन्द्र कानेपोखरी–६ नं वडाकमिटीको आयोजनामा बिहीबार बिहान ‘श्रम अभियान’ अन्तर्गत बिहिबारे बजार क्षेत्रमा सरसफाई तथा वृक्षारोपण कार्यक्रम सम्पन्न भएको छ।
सामाजिक रूपान्तरणको अभियानस्वरूप आयोजित कार्यक्रममा स्थानीयवासी, पार्टी कार्यकर्ता, युवाहरू र समाजसेवीहरूको उल्लेखनीय सहभागिता रहेको थियो। सडक, खोल्सा र सार्वजनिक स्थलहरूको सरसफाईसँगै विभिन्न स्थानमा विरुवा रोपिएको कार्यक्रमले क्षेत्रलाई हराभरा बनाउने संकल्प लिएको छ।
कार्यक्रममा नेकपा माओवादी केन्द्र कानेपोखरी गाउँ कमिटी अध्यक्ष दुर्गाबहादुर कार्की, वडा कमिटी अध्यक्ष रोशन राई तथा वैकल्पिक केन्द्रीय सदस्य जयराज संयोक प्रमुख अतिथिका रूपमा उपस्थित थिए।
उक्त अवसरमा बोल्दै नेता जयराज संयोकले पार्टीले केवल राजनीतिक परिवर्तनमा मात्र होइन, सामाजिक रूपान्तरणमा पनि उत्तिकै प्रतिबद्धता जनाएको बताए। “हामी जनताको सेवा र समृद्ध समाज निर्माणमा निरन्तर लागिपरेका छौं,” उनले जोड दिए।
यसअघि पनि नेकपा माओवादी केन्द्र कानेपोखरीले बाढीपीडितलाई राहत वितरण, विपन्न परिवारको घर निर्माण, अपांगता भएका व्यक्तिको उपचारमा आर्थिक सहयोग, र शिक्षा सामग्री वितरणजस्ता कार्यहरू गर्दै आइरहेको छ। पार्टीले यस्ता अभियानलाई निरन्तरता दिने र थप प्रभावकारी बनाउने घोषणा गरेको छ।
