काठमाडौं । इन्डियन प्रिमियर लिग (आईपीएल) फ्रेञ्चाइज टिम कोलकता नाइड राइडर्सले चन्द्रकान्त पण्डितलाई मुख्य प्रशिक्षक नियुक्त गरेको छ ।
कोलकताले रणजी च्याम्पियन प्रशिक्षक पण्डितलाई प्रशिक्षक नियुक्त गरेको हो । घरेलु क्रिकेटमा राम्रो सफलता हासिल गरेका चन्द्रकान्त पण्डितले जुनमा मध्य प्रदेशलाई पहिलो पटक रणजी उपाधि जिताएका थिए । त्यसअघ उनले मुम्बईबाट तीन र विदर्भबाट दुई पटक रणजी जितेका छन् ।
उनले अब ब्रेण्डन म्याकुलमको स्थान लिनेछन् । ब्रेन्डन म्याकुलम इंग्ल्याण्ड टेष्ट टिमको प्रशिक्षक नियुक्त भएपछि कोलकताको मुख्य प्रशिक्षक पद खाली थियो ।
मुख्य प्रशिक्षक नियुक्त भएपछि चन्द्रकान्त पण्डितले आफुन् लागि यो जिम्मेवारी एक सम्मान र सौभाग्यको विषय भएको बताएका छन् । ‘यो जिम्मेवारी पाउनु ठूलो सम्मान र सौभाग्य हो । मैले खेलाडी र अन्य साथीहरुबाट कोलकताको परिवारको संस्कृतिको बारेमा थाहा पाएको थिएँ,’ पण्डितले भनेका छन्, ‘म टिमको खेलाडी र सपोर्ट स्टाफको क्षमताबाट उत्साहि छु । र म सकरात्मक अपेक्षासहित यस अवसरलाई हेरिरहेको छु ।’
भारतीय राष्ट्रिय टिमका पूर्व विकेटकिपर समेत रहेका पण्डितले १९८६ देखि १९९२ सम्म भारतका लागि खेले । उनले ५ टेष्ट र ३६ एकदिवसीय अन्तर्राष्ट्रिय खेलेका छन् ।
चन्द्रकान्त पण्डि कोलकताको पहिलो भारतीय मुख्य प्रशिक्षक समेत हुन्छ । यसअघि अष्ट्रेलियाका जोन बुचानन, डेभ वाटमोर र ट्रेभोर बेलिस, दक्षिण अफ्रिकाका ज्याक कालिस र न्युजिल्याण्डका ब्रेण्डन म्याकुलम कोलकताको प्रशिक्षक थिए ।श्रोत ः अनलाइनखबर
