कमजोर कमाण्डिङ क्षमता भएका एसपीकाे हेरफेर

काठमाडौं । प्रहरी प्रधान कार्यालयले एक दर्जनभन्दा बढी जिल्लामा इन्चार्ज रहेका प्रहरी उपरीक्षक (एसपी)को हेरफेर तयारी थालेको छ । एक वर्ष अवधि पुगेका र कमजोर कमाण्डिङ क्षमताका कारण जिल्लामा हेरफेर हुन लागेको हो ।
यसपटक बारा, सुनसरी, इलाम, डोटी, कास्की, भक्तपुर, मकवानपुर, रौतहट, नुवाकोट, कपिलवस्तु जस्ता महत्वपूर्ण जिल्लाका प्रमुख परिवर्तन हुँदैछन् । उनीहरुको एक वर्ष अवधी पुगेका कारण प्रधान कार्यालयले हेरफेरको तयारी गरेको हो ।
हाल बारामा होविन्द्र बोगटी, सुनसरीमा प्रभु ढकाल, इलाममा दिलिप घिमिरे, कास्कीमा अजय केसी, भक्तपुरमा प्रजित केसी, मकवानपुरमा बामदेव गौतम, रौतहटमा बीर बहादुर बुढामगर, नुवाकोटमा रमेश पण्डित, कपिलवस्तुमा प्रेम बहादुर बस्नेत रहेका छन् ।
त्यस्तै डोटीमा राजेन्द्र धमला कार्यरत छन् । उनीहरुको एक वर्ष अवधी पुगेको कारण हेरफेर गर्न लागिएको प्रहरी प्रधान कार्यालय स्रोत बताउँछ ।
त्यस्तै, पर्साका एसपी कोमलविक्रम शाह र धनुषाका एसपी विश्वराज खड्काको समेत सरुवा हुनसक्ने बताइएको छ । कमजोर कमाण्डिङ क्षमताको आरोप लागेका उनीहरु जनताको शान्तिसुरक्षामा भन्दा कमाउधन्दामा बढी लागेको पाइएपछि परिवर्तन गर्न खोजिएको हो ।
एसपीको हेरफेर हुने भएपछि राम्रा राम्रा जिल्लामा जानको लागि तिव्र प्रतिस्पर्धा छ । मुख्यःतय कास्की, सुनसरी, मकवानपुर, कपिलवस्तु, बारा, पर्सा सर्लाही, मोरङ र धनुषामा जान एसपीहरु लागिपरेका छन् ।
एसपीहरु कृष्ण कोइराला, दयानिधी ज्ञवाली, दान बहादुर मल्ल, कृष्ण पंगेनी, श्यामकृष्ण अधिकारी, रवि पौडेल, मिलन केसी, भावेश रिमाल, गोविन्द काफ्ले मुख्य जिल्लामा प्रमुख दाबेदार रहेका छन् । उनीहरु कमाण्डि क्षमतामा समेत अब्बल रहेका छन् ।
तर, केही बदनाम एसपीहरुले पनि बारा, सुनसरी, मोरङ, कास्की जानलाई बालुवाटारमार्फत दबाब दिइरहेको स्रोत बताउँछ ।