जनकपुर । भारतबाट अपहरण गरी सर्लाहीको सीमावर्ती गाउँ ब्रह्मपुरी गाउँपालिका–४ मा बन्धक बनाएर राखिएका १५ वर्षीय बालकको प्रहरीले सकुशल उद्धार गरेको छ।
स्थित रामजी साहको घरमा सोमबार ति भारतीय बालकको उद्धार गरिएको हो। बालकको उद्धारका क्रममा अपहरणमा संलग्न २ नेपाली र एक भारतीय नागरिकलाई प्रहरीले पक्राउ गरेको छ। उनीहरूको साथबाट हतियारसमेत बरामद भएको प्रहरीले जनाएको छ।
जिल्ला प्रहरी कार्यालय सर्लाहीका डीएसपी दीपक श्रेष्ठका अनुसार घरमूली ६८ वर्षीय साहसहित सोही ठाउँका १९ वर्षीय विक्रम पासवान र भारत विहार राज्य सीतामढी जिल्ला राजवडा ग्राम पञ्चायत मुसहर्निया टोलका २७ वर्षीय प्रवचन साह पक्राउ परेका छन्।
प्रहरीका अनुसार भारतीय युवक प्रवचन अपहरणका मुख्य अभियुक्त हुन। डीएसपी श्रेष्ठाका अनुसार अपहृत बालकको उद्धार गरिएको स्थानबाट एउटा कटुवा पेस्तोल र दुई राउण्ड गोली र बीआर०६बीटी २८५० भारतीय नम्बर प्लेटको मोटरसाइकल बरामद गरिएको छ।
पक्राउ परेका तीनै जनालाई अपहरण, शरीर बन्धक तथा हातहतियार खरखजानासम्बन्धी कसुरमा जिल्ला अदालतबाट सात दिनको म्याद थप गरेर अनुसन्धान भइरहेको जिल्ला प्रहरी कार्यालयले जनाएको छ।
