इनरुवा । इटहरीको मुख्य चोकमा टिपरले स्कुटरलाई ठक्कर दिंदा एक महिलाको ज्यान गएको विरोधमा इटहरी बजार तनावग्रस्त भएको छ ।
स्थानीयले ठक्कर दिने टिपर तोडफोड गरेका छन् । सामाजिक सञ्जालमा प्रत्यक्ष प्रसारण गरिएको भिडियो भाइरल भएको छ ।
इटहरी प्रहरीले भने घटना बारे जानकारी दिएको छैन । ‘अहिले यहाँ लफडा भइरहेको छ, तपाईंलाई पछि फोन गर्छु,’ इटहरी प्रहरीको मोबाइल नम्बर ९८५२०६३६३२ मा सम्पर्क गर्दा प्रहरी अधिकारीले भने ।
बालुबा बोक्ने टिपरलाई प्रहरीले निगरानी नगरेको भन्दै स्थानीयले विरोध प्रदर्शन गरिरहेका छन् । बीच बजारमा तीव्रगतिमा टिपर हाँक्ने गरेको गुनासो गर्दै स्थानीयले बेलुका छ बजेपछि मात्रै चलाउनु दिनुपर्ने बताएका छन् ।
स्थानीयका अनुसार को १४ प ५२६ नम्बरको स्कुटरलाई कान्छाराम कन्स्ट्रक्सनको ना १ क ९१०७ नम्बरको टिपरले ठक्कर दिएको हो ।
टिपरले ब्याक गरेर मान्छे मारेको भन्दै स्थानीयले नाराबाजी गर्दै टिपर तोडफोड गरेका छन् ।
तोडफोड र नाराबाजी हुन थालेपछि प्रहरीले बल प्रयोग गरी भीड हटाएको बताइएको छ । इटहरी चोकमा सवारी आवागमन ठप्प छ । सवारी साधनहरुलाई वैकल्पिक बाटोबाट पठाइएको छ ।
