रुपन्देही । रुपन्देहीको सिद्धार्थनगर नगरपालिका वडा नम्बर १ र २ का बासिन्दाले डण्डा खोला किनारमा बस्ती नजिकै फोहोर नफाल्न माग गर्दै सोमबार नगरपालिका कार्यालय अगाडि विरोध प्रदर्शन गरेका छन् । उनीहरुले आइतबार राति प्रहरी प्रशासनको बलमा फोहोर फाल्न खोजिएको विरोधमा प्रर्दशन गरेका हुन् ।
उनीहरुले मेयर इश्तियाक अहमद खान र उपमेयर उमा अधिकारीविरुद्ध नाराबाजी गरेका छन् । सिद्धार्थनगर– २ का सञ्जीव गुरुङले नगरका सम्पूर्ण क्षेत्र हराभरा बनाउने तर फोहोर जति वडा नम्बर १ र २ मा फाल्नु जायज नभएको बताए ।
उनले नदी किनार र बस्ती नजिकै फोहोर फाल्दा स्थानीयवासी विभिन्न रोगबाट ग्रसित भएको बताए । गुरुङले भने, ‘कतिपय नागरिकको क्यान्सरबाट निधन भइसकेको छ । कतिपय क्यान्सर तथा छालासम्बन्धी रोगबाट पीडित हुनुहुन्छ ।’यसअघि फोहोरमैला व्यवस्थापनका लागि आवाज उठेको र तत्कालीन मेयर हरिप्रसाद अधिकारीले समाधानका लागि पहल गरे पनि वर्तमान मेयर ३ दिन फोहोर थुप्रिँदा आत्तिएको आन्दोलनकारीहरुले आरोप लगाए ।
मेयर खानले नगरपालिकाको गतिविधिबाट पीडित नागरिकको गुनासो नसुनेको आन्दोलनकारीहरुको गुनासो छ ।
सिद्धार्थनगर नगरपालिका- २ का निवर्तमान वडाध्यक्ष दीपककुमार थापाले छापामार शैलीमा आइतबार राति फोहोर फाल्ने प्रयास गरिएको भन्दै आपत्ति जनाए । उनले भने, ‘प्रहरी प्रशासन लगाएर मेयरज्यूले तानाशाह प्रवृत्ति देखाउनुभयो । अब हामी एकजुट भएर अघि बढ्छौं ।’
सिद्धार्थनगर नगरपालिका-२ का वडाध्यक्ष छेदीलाल श्रीवास्तवले वर्षौंदेखि वडावासी समस्यामा परेको बताए । उनले सिद्धार्थनगर नगरपालिकाले समस्या समाधानका लागि दीर्घकालीन योजना बनाउनुपर्ने बताए ।
सिद्धार्थनगर नगरपालिका–२ का वडा सदस्य दीपेशप्रताप शाही, स्थानीय सुनिल पुन, प्रशान्तमणि रामदामलगायतले फोहोर फाल्न रोक्नुभन्दा पहिले नगरपालिकामा गइ पूर्वजानकारी दिए पनि नगरपालिका गम्भीर नभएको बताए ।
चार दिनयता नगरपालिकाले फोहोर फाल्दै आएको ठाउँमा स्थानीयले अवरोध गरेपछि समस्या समाधान हुन सकेको छैन । सिद्धार्थनगरमा संकलित फोहोर सिद्धार्थनगर-२ स्थित मेउडिहवा नजिकै डण्डाखोलामा थुपार्ने गरिएको छ । फोहोर फाल्दै आएको स्थानको नजिकै पक्लिहवा कृषि क्याम्पस र सशस्त्र प्रहरी बल २७ नम्बर गण पनि रहेको छ ।
सिद्धार्थनगरका मेयर खानले आफूले नगरपालिकाको जिम्मेवारी सम्हालेदेखि नै फोहोरमैला व्यवस्थापनसम्बन्धी समस्या समाधानका निम्ति लागिपरेको दाबी गरेका छन् ।
उनले तिहारसम्म समय दिन स्थानीयसँग आग्रह गरेको बताए । ‘कुनै प्रकारको झैझगडा नहोस् भन्ने उद्देश्यले फोहोर फाल्ने स्थानमा सुरक्षाका लागि प्रहरी गएको हो’, मेयर खानले भने, ‘पूर्वाधार बनाउन पनि केही समय त लाग्छ ।’
२०३२ सालदेखि फोहोरमैलासम्बन्धी समस्या रहेको र नागरिक पीडामा रहेको कुरा आफूले बुझेको उनले बताए ।
