फागुन १५ गते,इनरुवा । भारतसँग सीमा जोडिएको सुनसरी जिल्लामा पर्ने दशगजा क्षेत्रमा भारतीय नागरिक र सीमा सुरक्षामा खटिएको अर्धसैनिक बल एसएसबी स्वयमले अतिक्रमण गरेको पाइएको छ ।
प्रमुख जिल्ला अधिकारी जयनारायण आचार्यको नेतृत्वमा सुनसरीको जिल्ला सुरक्षा समितिले थालेको दशगजा पैदल यात्राको क्रममा धेरै ठाँउमा भारतीय नागरिकहरुले दजगजा क्षेत्र अतिक्रमण गरेर खेति गरिरहेको, गाइगोठ बनाएको र स्वयम सीमा सुरक्षामा तैनाथ भारतीय अर्धसैनिक बल एसएसबीले अस्थायी सुरक्षा पोष्टहरु खडा गरेको पाइएको हो ।
हरिनगर गाउँपालिकादेखि कोशी गाउँपालिकाको लौकहीसम्मको सीमा अनुगमनको क्रममा धेरै ठाँउमा भारतीय नागरिकहरुले दशगजा अतिक्रमण गरेर मकै, तोरी र गहुँ खेती गरेको, गाईबस्तु बाँध्ने गोठ बनाएको पाइएको थियो । त्यस्तै सो क्षेत्रमा एसएसबीले दशगजा क्षेत्रभित्रै अस्थायी पोष्टहरु निर्माण गरेको भेटिएको थियो ।
एसएसबीले आफ्नो मुल पोष्टभन्दा बाहिर दशगजा र आसपासका क्षेत्रमा प्रत्येक एक किलोमिटरमा अस्थायी टहर बनाएर सुरक्षामा तैनाथी हुने गरेका छन । ति अस्थायी पोष्टहरु भने दशगजा क्षेत्रमै हुने गरेका छन ।
त्यस्तै दशगजासँगै जोडेर भारत पक्षले बाढीको पानी जमेर नेपाली भूमी डुबान हुने गरी घुरना क्षेत्रमा पक्की सडक नै निर्माण गरेको पाइएको थियो । अन्तर्राष्ट्रिय सीमाको मान्यता अनुसार त्यसको निश्चित क्षेत्रभित्र कुनै त्यस्तो संरचना निर्माण गर्न पाइदैन । सो क्षेत्रमा बनाइएको सडकले नेपालतर्फबाट जाने वर्षाको पानीलाई रोकेर डुबान गराउने गरेको स्थानीयहरुले जनाएका छन ।
दशगजा क्षेत्रमा रहेका नेपाली नागरिकहरुले दशगजा छाडेर खेती र गोठ निर्माण गरेको भएपनि भारतीय पक्षले भने धेरथोर अधिकांश ठाँउमा अतिक्रमण गरेको देखिएको थियो । त्यसैगरी दशजगा क्षेत्रलाई गाईबस्तु चराउने, अन्नबाली सुकाउने, निर्माण सामग्रीहरु राखेर निर्माण गर्ने प्रचलन पनि देखिएको थियो । कतिपय स्थानमा त दशगजा पारी भारततर्फ घर भएकाहरुले दशगजालाई आफ्नै जग्गा भन्दै अरु गाइबस्तु चराउन आउनेलाई गाली गलौच गर्दै खेदाउने गरेको समेत पाइएको थियो ।
सीमाको पैदल अवलोकनको क्रममा घुस्कीमा अन्र्तक्रियामा प्रमुख जिल्ला अधिकारी आचार्यले अनुगमनको क्रममा केही ठाँउमा दशगजामा ब्यक्तिहरुले घर बनाएको र अतिक्रमण गरेको देखिएकोले त्यसलाई खाली गराउने प्रक्रिया सुरु गरेको जानकारी दिएका थिए ।
सोही टोलीमा सहभागि सुनसरीका प्रहरी प्रमुख बिपिन रेग्मीले स्थलगत अवलोकनको क्रममा स्थानीय भारतीयहरुले केही ठाँउमा दशगजा अतिक्रमण गरेर बालिनाली लगाएको गोठ र टहरा बनाएको पाइएको बताए ।
सुनसरी जिल्लाको भारतसँग जोडिएको ६१ दशमलब ९ किलोमिटर सीमा रहेको छ । जसमा २ सय ९० सीमा स्तम्भहरु पर्दछन । यहाँको २५ वटा स्तम्भ गायब रहेको बताइएको छ । सुनसरी जिल्ला भारतको अररिया र सूपौल जिल्लासँग जोडिएको छ ।
स्राेत : वर्णमाला दैनिक
