फागुन १६ गते, सुनसरी । नेपाल नागरिक उड्यन प्राधिकरणले धरानमा विमानस्थल बनाउन उपयुक्त नदेखिएको निष्कर्ष निकालेपछि धरान उपमहानगरपालिकाका मेयर हर्क साम्पाङ आक्रोशित बनेका छन् ।
विमानस्थल बनाउन उपयुक्त नहुने प्राधिकरणको निष्कर्षपछि उनले सामाजिक सञ्जालमार्फत् आक्रोश व्यक्त गरेका हुन् । संस्कृति, पर्यटन तथा नागरिक उड्ड्यनमन्त्री सुदन किरातीसँग उनले आक्रोश पोखेका छन् ।
प्राधिकरणले धरानमा विमानस्थल निर्माण गर्न सम्भव नरहेको निष्कर्ष निकालेको थियो । उनले मन्त्री किराँतीविरुद्ध सामाजिक संजाल फेसबुकमा आधा दर्जनभन्दा बढी स्ट्याटस नै लेखेका छन् । उनले मन्त्री किराँतीलाई मन्त्री कि कुचीकार भनेर प्रश्न समेत गरेका छन् । ‘सुदन किराँती मन्त्री नै हुन् कि कुचीकार ? खोइ त प्राधिकरणलाई तह लगाएको ? कुलको बदनामी,’ उनले भनेका छन् ।
उनले मन्त्रीले कुलकै बेइज्जत गरेको आरोप पनि लगाएका छन् । प्राधिकरणले विद्यमान हवाई नीति, २०६३ अनुसार धरानमा विमान स्थल बनाउन नसकिने निष्कर्ष निकालेको थियो । नीतिअनुसार तराई तथा भित्री मधेशमा विमानस्थल निर्माण गर्दा निकटस्थ विमानस्थलबाट कम्तीमा ४० नटिकल माइल हुनुपर्ने उल्लेख छ ।
धरानमा विमानस्थल बनाउनुपर्ने धरान उपमहानगरपालिका मेयर हर्क साङ्पाङले दबाब दिएका थिए । त्यसपछि सरकारले समिति बनाएर यहाँ विमानस्थल आवश्यक रहे–नरहेकोबारे अध्ययन गरेको थियो ।
सोही अध्ययन आधारमा धरानमा विमानस्थल आवश्यक नरहेको निष्कर्षमा प्राधिकरण पुगेको हो ।
