बिराटनगर । मोरङमा एक पुरुषको बीभत्स हत्या भएको छ । जिल्लाको सुन्दरहरैँचा ९ स्थित आज (बिहीबार) कुखुरा फार्म सञ्चालकको हत्या भएको हो ।
स्थानीय ४९ वर्षीय सहदेव बजगाईंको हत्या भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी दिए । घर नजिक कुखुरा फार्म सञ्चालन गर्दै आएका बजगाईंको फार्मभित्रै हत्या भएको उनले बताए ।
बस्नेतका अनुसार मृत अवस्थामा भेटिएका उनको टाउको र शरीरका अन्य विभिन्न भागमा क्षतविक्षत अवस्था रहेको छ ।
बजगाईंले खुकुरा फार्ममा काम गर्नका लागि एक दम्पतीलाई राखेको र हाल भने दम्पती फरार रहेको उनले बताए । डीएसपी बस्नेतले भने, ‘हत्या गरेर दम्पती फरार बनेको हुनसक्ने आशंका छ । हामीले उनीहरूको खोजीसँगै प्रारम्भिक अनुसन्धान सुरु गरेका छौँ ।’
घटनास्थलबाट एउटा बन्चरो र दाउसमेत बरामद गरिएको प्रहरीले जनाएको छ । शवलाई पोस्टमार्टमका लागि अस्पताल पठाएर आवश्यक अनुसन्धान भइरहेको प्रहरीको भनाइ छ ।
