मंसिर २८ गते,इनरुवा । सुनसरीको भाेक्राहा नरसिंह गाउँपालिका वडा नं-३ डलवा टाेलमा जारी शिवगंज प्रीमियर लिग क्रिकेट प्रतियोगिता अन्तर्गत बिहीबार दुईवटा खेल सम्पन्न भएकाे छ ।
भाेक्राहा नरसिंह गाउँपालिका वडा नं-३ डलवा टाेलमा पहिलाे पटक शिवगंज प्रिमसयर लिग उपभोक्ता समितिकाे आयाेजनामा जारी प्रतियोगिताको बिहीबार बिहान सम्पन्न भएको पहिले खेलमा हरिनगरालाई १८ रनले हराउँदै भण्टाबारी विजयी भएको आयोजक समितिका अध्यक्ष पंकज यादवले जानकारी दिए ।
१६-१६ ओभर खेलमा टस जितेर पहिले ब्याटिङ गर्दै भण्टाबारीले ८ विकेट गुमाएर १३१ रनको योगफल तयार पारेको थियो । भण्टाबारीको लागि अमित कुमारले सर्वाधिक ५९ रन तथा सादिस आलमले ३५ रन बनाए । जवाफ १३२ रनको चुनौती पछ्याउँदै ब्याटिङ गरेको हरिनगराले निर्धारित १६ ओभरमा ८ विकेट गुमाउँदै ११३ रन मात्रै बनाउन सक्यो ।
पहिले खेलको म्यान अफ द म्याच भण्टाबारीका अमित कुमार घोषित भए उनलाई भाेक्राहा नरसिंह गाउँपालिका वडा नं-३ का वडा अध्यक्ष धीरेन्द्रकुमार यादवले पुरस्कार एवं मेडल वितरण गरे । यस्तै बिहीबार सम्पन्न दोस्रो खेलमा बसमतियालाई १५ रनले हराउँदै बेरियाकमाल विजयी भएको आयोजक संस्थाका सचिव शिवन यादवले जानकारी दिए । मंसिर २७ गते बाट सुरु भएकाे प्रतियोगिताको भाेक्राहा नरसिंह गाउँपालिकाका अध्यक्ष अजमल अख्तर अजादले उद्घाटन गरेका थिए ।
प्रतियोगिताको उद्घाटन खेलमा भाेक्राहा नरसिंह गाउँपालिका वडा नं-७ का राेलेक्स युवा क्लब नरसिंह विजयी भएको थियो । पुस ७ गतेसम्म संचालन हुने प्रतियोगितामा भारतका चार गरी जम्मा १६ वटा टीम सहभागिता रहेको आयोजकले जनाएको छ । प्रतियोगिताको विजेताले नगद ५१ हजारसहित सिल्ड,मेडल तथा प्रमाणपत्र हात पार्नेछ भने उपविजेताले नगद ३० हजारसहित सिल्ड,मेडल तथा प्रमाणपत्र हात पार्ने आयोजकले जनाएको छ ।
