इनरुवा, कार्तिक १० गते । सुनसरीको कोशी गाउँपालिका–५ हुडकी टोलमा भएको लागुऔषध (गाँजा) नियन्त्रण घटनामा जिल्ला प्रहरी कार्यालय सुनसरी स्वयं विवादमा तानिएको छ। प्रहरीले घटना सम्बन्धी सञ्चारमाध्यमलाई पठाएको विवरण र वास्तविक घटनाबीच ठुलो फरक देखिएको छ।
कार्तिक ५ गते बुधबार बिहान प्रहरी चौकी श्रीपुरजब्दीबाट खटिएको सहायक निरीक्षक पवनकुमार रायको नेतृत्वमा गस्ती टोलीले विशेष सूचनाका आधारमा हुडकी टोलस्थित मोहम्मद नुरुल हक (बिजली) को घरमा छापा मारेको थियो। उक्त क्रममा भारतको सुपौल जिल्ला किसनपुर पंचायत–६ तिरगंज निवासी करिब २२ वर्षीय इम्तियाज मियाँलाई १२३.५ केजी गाँजा सहित रंगेहात पक्राउ गरिएको थियो। इम्तियाज मियाँ गाँजा झार्ने क्रममा घरमै समातिएका थिए भने सवारी चालकलाई प्रहरीले उम्काएका थिए ।
स्थानीय स्रोतका अनुसार, गाँजा मोहम्मद नुरुल हक (बिजली) को घरभित्रै तयारी अवस्थामा फेला परेको थियो, जसको सवारी प्र.१–०२–००३ ह ८७०५ नम्बरको सिटी सफारी रहेको पुष्टि गरिएको छ।
तर, जिल्ला प्रहरी कार्यालय सुनसरीले सञ्चारकर्मीहरुलाई पठाएको सूचनामा भने घटनालाई तोडमोड गरी प्रस्तुत गरेको आरोप लागेको छ। प्रहरीले बबिया मिडिया प्रा.ली.द्वारा सञ्चालित आवर सुनसरी डट कम को आधिकारिक इमेलमा पठाएको सूचनामा “सिटी चालक फरार भएको, गाँजा सवारीभित्र फेला परेको र चालक नाम नखुलेको” भन्ने उल्लेख गरेको थियो।
तर वास्तविकतामा, पक्राउ परेका व्यक्ति सवारीभित्र होइन, मोहम्मद नुरुल हक (बिजली) को घरभित्र गाँजा झार्दै गर्दा पक्राउ गरिएको प्रत्यक्षदर्शीहरूले बताएका छन् र तस्बिर समेत सार्वजनिक भएकाे छ ।
यसरी घटना विवरणमा तोडमोड र झुठा सूचना प्रवाह गरेको भन्दै जिल्ला प्रहरी कार्यालय सुनसरीमाथि प्रश्न उठ्न थालेको छ।
प्रहरीले बबिया मिडिया प्रा.ली.द्वारा सञ्चालित आवर सुनसरी डट कम को आधिकारिक इमेलमा पठाएको सूचना यस्तो थियाे “लागू औषध गाँजा सहित मानिस र सवारी नियन्त्रणमा
मिति २०८२।०७।०५ गते ०१:३० बजेको समयमा जिल्ला सुनसरी कोशी गाँउपालिका वडा नं.-०५ स्थितमा लागू औषध ओसार पसार तथा कारोबार भइरहेको छ भन्ने विशेष सुचनाको आधारमा प्रहरी चौकी श्रीपुरजब्दी सुनसरीबाट खटिएको प्रहरी टोलीले प्र १-०२-००३ ह ८७०५ नम्बरको सिटि रिक्सालाई पछयाउदै जाँदा जिल्ला सुनसरी कोशी गाँउपालिका वडा नं. ०५ वडा कार्यालय नजिक सिटि छाडी तत्काल नाम वतन नखुलेको सिटि चालक फरार भएको र उक्त सिटिलाई कानुन बमोजीम चेकजाँच गर्दा ४ बोरा लागू औषध गाँजा जस्तो देखिने पदार्थ १२३.१५ केजि ( एक सय तेइस किलो पन्ध्र ग्राम ) फेला परेको हुँदा उक्त लागू औषध गाँजा जस्तो देखिने पदार्थ सहित उक्त सिटिमा सवार देश भारत जिल्ला सुपौल किसनपुर पंचायत वडा नं.-०६ तिरगंजमा बस्ने वर्ष २० को मोहमद ईम्तियाज मिया र सवारीलाई नियन्त्रणमा लिई जिल्ला प्रहरी कार्यालय सुनसरीमा ल्याई थप अनुसन्धान गर्ने कार्य भइरहेको, साथै फरार सिटि चालकको खोजतलास गर्ने कार्य भईरहेको ।”
