गनेश कुमार यादव
इनरुवा । सुनसरीको इनरुवा-३ स्थित रहेकमे जनक स्मृति माध्यमिक विद्यालय कक्षा ८ का विद्यार्थीहरूले जिल्ला प्रहरी कार्यालय सुनसरी परिसरमा अध्ययन तथा अवलोकन भ्रमण गरेका छन्।
बिहीबार भ्रमणका क्रममा विद्यार्थीहरूले प्रहरीको दैनिक कार्यप्रणाली, समाजमा शान्ति–सुरक्षा कायम गर्न प्रहरीले खेल्ने भूमिका तथा विभिन्न परिस्थितिमा प्रहरीसँग कसरी सहयोग लिन सकिन्छ भन्ने विषयमा जानकारी प्राप्त गरेका थिए। साथै उनीहरूले कार्यालयभित्र रहेका विभिन्न विभागहरूको प्रत्यक्ष अवलोकन समेत गरेका थिए।
अवलोकन भ्रमणका बेला सामुदायिक प्रहरी विभाग लगायत अन्य विभिन्न शाखाका प्रहरी अधिकृतहरूले विद्यार्थीहरूलाई विभागीय काम, जिम्मेवारी तथा सेवा प्रवाहबारे जानकारी गराएका थिए। प्रहरी निरीक्षक, सहायक निरीक्षक लगायतका प्रहरी कर्मचारीहरूले विद्यार्थीहरूलाई प्रहरी सेवासम्बन्धी विविध पक्षहरूबारे प्रष्ट पार्दै जिज्ञासाको उत्तर दिएका थिए।
विद्यालयले यस्तो भ्रमणले विद्यार्थीहरूलाई व्यवहारिक ज्ञान प्राप्त गर्न तथा समाजमा सुरक्षासम्बन्धी सचेतना बढाउन महत्वपूर्ण योगदान पुग्ने विश्वास व्यक्त गरेको छ।
