२०८२ मङ्सिर ४ गते, काठमाडौँ । दक्षिण एसियाली स्वास्थ्य समुन्नति कार्यक्रम नेपाल (हाप्सा नेपाल) ले आपत्कालीन स्वास्थ्य समस्या तथा चोटपटको बारेमा जानकारी दिने एप सार्वजनिक गरेको छ । संस्थाले बुधबार काठमाडौँको दरबार हाई स्कुलमा एक कार्यक्रमका बिच ‘कम्युनिटि इमर्जेन्सी रेस्पोन्स टुलकिट, सीआईआरटी’ नामक एप सार्वजनिक गरेको हो ।
‘सडक साथी’ नामक संस्थाको प्राविधिक सहयोगमा तयार पारिएको सो एपमा आपत्कालीन स्वास्थ्य अवस्थामा बिरामीलाई सहयोग गर्ने तरिकालाई नेपाली भाषामा सरल तरिकाले सिकाउने भिडिओ राखिएका छन् । एपमा घाँटीमा कुनै वस्तु अड्किएर निसासिँदाको प्राथमिक उपचार (चोकिङ), रक्तस्राव नियन्त्रण, जलन, हड्डी भाँचिदाको प्राथमिक उपचार, मुटुको चाल रोकिएको अवस्था (कार्डियाक एरेस्ट) तथा अन्य आपत्कालीन अवस्थाहरूमा कसरी हेरचाह गर्न सकिन्छ भन्ने विषय समेटिएका छन् ।
हाप्सा नेपालका संस्थापक डा रामु खरेलका साथै अन्य अन्तर्राष्ट्रिय आपत्कालीन चिकित्सकहरूले उपलब्ध गराएको सुझावअनुसार उक्त भिडिओहरू तयार पारेर एपमा राखिएको हुन् । ग्लोबल हेल्थ मिडियाको सहयोगमा खिचिएका १९ ओटा भिडिओहरू एपमा उपलब्ध रहेको संस्थापक खरेलले बताए । उनका अनुसार यी भिडिओहरू अफलाइन डाउनलोड गरेर पनि प्रयोगकर्ताहरूले हेर्न सक्ने गरि राखिएका छन् ।
सीपीआर लगायतका आपत्कालीन अवस्थामा गर्ने क्रियाकलापका बारेमा सबै स्थानमा तालिम दिन, बुझाउन गाह्रो पर्ने भएकाले डिजिटल तरिकाबाटै सचेतना फैलाउन यो एप तयार पारिएको उनले बताए । यता हाप्साका सीपीआर विभागका कार्यकारी प्रमुख डा कमल थापा अकस्मात मुटु रोकिएको समयमा सीपीआर पाउँदा बिरामीको ज्यान बच्न सक्ने सम्भावना दुईदेखि तीन गुणासम्म बढ्ने बताउँछन् । त्यसैले सीपीआर, चोटपटकको प्राथमिक उपचार लगायतका ज्ञान आम मानिसहरू माझ पुर्याउन आवश्यक रहेको उनको भनाइ छ ।
संस्थाले बुधबार नै दरबार हाइस्कुलका शिक्षक र विद्यार्थीसहित ४० जनालाई सीपीआरसम्बन्धी तालिम उपलब्ध गराएको छ । संस्थाले सशस्त्र प्रहरीहरूलाई पनि सीपीआर र चोकिङ सम्बन्धी तालिम दिँदै आएको संस्थापक खरेलले जानकारी दिए । हालै सार्वजनिक भएको एपले धेरै व्यक्तिहरूलाई सहयोग पुग्ने उनको भनाई छ ।
हाल सीईआरटी एप एन्ड्रोइड डिभाइसहरूका लागि उपलब्ध छ । एप्पल आईओएस एप स्टोरमा भने आगामी हप्तासम्ममा उक्त एप सार्वजनिक गर्ने गरी तयारी भइरहेको सडक साथीका संस्थापक निपुन न्यौपानेले बताए । एन्ड्रोइड प्रयोगकर्ताहरूले सो एप यहाँ क्लिक गरेर डाउनलोड गर्न सक्नेछन् ।
श्राेत : टेक पाना
