मंसिर १९ गते,झुम्का । बजार व्यवस्थापन र व्यावसायीको सुरक्षाका लागि नगरप्रहरी आवश्यक परेको भन्दै झुम्काका उद्योगी तथा व्यापारीले नगर प्रहरीको व्यवस्था गर्न माग गरेका छन् ।
झुम्का उद्योग वाणिज्य संघले नगर प्रहरीको व्यवस्था गरिदिन माग गर्दै नगर प्रमुख शंकरलाल चौधरीलाई ज्ञापन पत्र बुझाएको समेत लामो समय भइसक्दा समेत नगरले प्रक्रिया अघि नबढाएको उनिहरुको गुनासो छ ।
बजारको सुरक्षाका साथै बजार सौन्दर्यीकरणको लागि नगर प्रहरीको आवश्यकता परेको भन्दै उनीहरुले नगर प्रहरीको व्यवस्था गर्न नगरको ध्यानाकर्षण गराएको थियो ।
सरकारको एक पालिका एक इलाका प्रहरी नीति अन्तर्गत इलाका प्रहरी कार्यालय प्रस्तावित रुपमा आएपनि स्थाई इलाका नहुँदा व्यापारी र बजारको सुरक्षाका लागि नगरप्रहरी आवश्यक पर्ने व्यवसायीहरुको आवाज छ ।
अघिल्लो आर्थिक बर्षदेखि नगरपालिकामा नगरप्रहरी आवश्यक भएको आवाज उठ्दा आफूहरुसँग बजेट अभाव भएको भन्दै पन्छिएको नगरपालिका यसपालि बजेट विनियोजन गर्दा समेत अहिले सम्म नगरप्रहरी भर्ना प्रक्रियामा प्रवेश नगरेको व्यवसायीहरुको गुनासो छ ।
झुम्का उद्योग वाणिज्य संघले झण्डै ६ महिना पहिल्यै नगर प्रहरीको माग गर्दै नगरमा पत्राचार रहेको थियो । ‘हामीलाई कहिले बजेट अपुग रहेको त कहिले नियमावली तथा कार्यविधि नबनेको भन्दै पन्छाउने काम गरिँदैछ तर छिमेकी नगरपालिकाहरुमा आफ्नै नगरप्रहरी भएको लामो समय हुँदा पनि हाम्रोमा नगर प्रहरीको व्यवस्थापन किन हुन सकिरहेको छैन ’ झुम्का उद्योग वाणिज्य संघका वाणिज्य सचिव मनिष गेलालको प्रश्न छ ।
उद्योग वाणिज्य संघका अध्यक्ष नविन चौधरीले समेत नगरप्रहरी व्यावस्थापन गर्न नगरपालिकाले आलटाल गरिरहेको बताएका छन् । नगर प्रहरीको लागि भनेर भवन निर्माणको काम समेत सकिसक्दा पनि नगरप्रहरी भर्ना तथा छनौट प्रक्रिया शुरु नगरिएको चौधरीले बताए ।
रामधुनी नगरपालिकाले बारुणयन्त्र खरिद गरेर वारुणयन्त्रको लागि मात्रै कर्मचारी नियुक्ति गरेको छ भने नगर प्रहरीको लागि अहिले प्रक्रिया नै शुरु गरेको छैन ।
यसै बर्ष धेरै नभएपनि ४ जना सम्म नगरप्रहरी राख्न सकिने गरिको बजेट विनियोजन गरिएको रामधुनी नगरपालिकाकी उपप्रमुख तारा थापा बताउँछिन ।
‘मैले मेयरसाप सँग कुरा गरिरहेकी छु सायद अबको कार्यपालिका बैठकमा नगरप्रहरी राख्ने सम्बन्धमा हामी छलफल गर्छौँ ।’थापाले बेष्ट सञ्चारसँगको कुराकानीमा भनिन ।
नगर प्रमुख शंकरलाल चौधरीले भने नगरप्रहरी सम्बन्धि कार्यविधि तथा नियमावली विधान समितिले निर्माण गरिसकेको र छिटोमा पौष महिनामा हुने हिउँदे अधिवेशन पछि नगर प्रहरीको भर्ना खोल्न सकिने संकेत गरेका छन् ।
कार्यविधि बनिसक्यो, बारुणको लागि र नगर प्रहरीको लागि छुट्टा छुट्टै जनशक्ति भर्ना गर्नेगरी को तयारीमा हामी छौँ बजेट अनुसार थोरै संख्यामा भएपनि यसै आर्थिक बर्षको बजेटबाट नगरप्रहरी राख्न हामी प्रतिवद्ध छौँ । नगरप्रमुख चौधरीको भनाई थियो ।
