गनेश कुमार यादव
पुस ८ गते,सुनसरी । सशस्त्र प्रहरी बल नेपाल सुरक्षा बेस धरानले १५० किलो लागू औषध गाँजासहित एक अटो चालकलाई नियन्त्रणमा लिएको छ।
सशस्त्र प्रहरी बल नेपालका अनुसार हिजाे ७ गते साेमबार राति करिब २०:१५ बजेको समयमा सुनसरीकाे धरान उपमहानगरपालिका–१३ फुस्रे स्थित सुरक्षा बेस धरानबाट सशस्त्र प्रहरी नायब उपरीक्षक सुदन आचार्यको कमाण्डमा खटिएको चेकप्वाइन्ट टोलीले धनकुटा हुँदै चिण्डे डाँडाबाट धरानतर्फ आउँदै गरेको सवारी साधन चेकजाँच गरेको थियो।
चेकजाँचका क्रममा को २ ह ५९३४ नम्बरको हरियो रङ्गको तीन पाङ्ग्रे अटो शंका लागी रोक्का गरी जाँच गर्दा सवारी चालक जिल्ला सुनसरी धरान उपमहानगरपालिका–१३ निवासी अन्दाजी २८ वर्षीय राकेश मरिकले चलाएको अटोभित्र ५ पोका गरी राखिएको अन्दाजी १५० किलो लागू औषध गाँजा फेला परेको सशस्त्र प्रहरीले जनाएको छ।
बरामद गरिएको गाँजा, अटो तथा चालकलाई आवश्यक कानुनी कारबाहीका लागि इलाका प्रहरी कार्यालय धरानमा बुझाइएको जनाइएको छ। सशस्त्र प्रहरीले लागू औषध ओसारपसार नियन्त्रणका लागि निगरानी र चेकजाँचलाई थप कडाइ गरिएको बताएको छ।
