इनरुवा, साउन ३० गते। भारतको ७८औं स्वतन्त्रता दिवसको अवसरमा नेपाल-भारत मैत्री संघ, सुनसरी जिल्ला शाखा इनरुवाको आयोजनामा इनरुवा-१ मा एकदिने नि:शुल्क रक्त परीक्षण कार्यक्रम सम्पन्न भएको छ।
शुक्रबार नेपाल-भारत मैत्री संघको कार्यालयमा नुतन ल्याब इनरुवा-१को सहकार्यमा सञ्चालन गरि सम्पन्न भएको हो। कार्यक्रममा जेष्ठ नागरिकहरूका लागि मधुमेह (सुगर) र मृगौला (किडनी) रोग सम्बन्धी(Blood Sugar (F), Blood Sugar (PP) र S. Creatinine) सम्बन्धी रक्त परीक्षणहरू निःशुल्क प्रदान गरिएको थियो।
नेपाल र भारतबीचको ऐतिहासिक र मैत्रीपूर्ण सम्बन्धलाई अझ सुदृढ बनाउन यस्तो समाजसेवामूलक कार्यक्रमले सकारात्मक प्रभाव पार्ने आयोजक संस्थाका पदाधिकारीहरूले बताए।
कार्यक्रममा संघका पदाधिकारी, स्थानीय समाजसेवी, स्वास्थ्यकर्मीहरू र लाभार्थीहरूको उपस्थिति रहेको थियो। सहभागिहरूले यस्तो सेवा निरन्तर सञ्चालन गर्न अनुरोध गरेका छन्।
