विराटनगर, साउन ३ गते। कोशी प्रदेशको विराटनगरस्थित प्रहरी कार्यालयमा सोधपुछका क्रममा तीन जना मजदुरमाथि प्रहरीद्वारा कुटपिट गरिएको आरोप लागेको छ। पीडित पक्षका अनुसार सादा पोसाकमा खटिएका प्रहरी हवल्दार (दावा शेर्पा)ले पाइप र बुट प्रयोग गरेर कुटपिट गरेका हुन्।
नेपाल विद्युत् प्राधिकरण, कोशी प्रदेशले पछिल्लो समय बढ्दै गएका ट्रान्सफर्मर चोरीका घटनाबारे अनुसन्धान गर्न प्रहरीलाई आग्रह गरेपछि कोशी प्रदेश प्रहरी कार्यालय विराटनगरले विशेष टोली खटाएर अनुसन्धान सुरु गरेको थियो। यही क्रममा बुढीगंगा गाउँपालिका–४ का ३९ वर्षीय नासिर मिया, ३० वर्षीय कासी शर्मा र ३४ वर्षीय रमजान मियालाई बिहीबार इलाका प्रहरी कार्यालय रानीमा बोलाइएको थियो।
तीनै जना ‘जनसेद मिया मल्टिपर्पोज प्रालि’ नामक कम्पनीमा कार्यरत श्रमिक भएको जनाइएको छ। कम्पनीका सञ्चालक जनसेद मियाका अनुसार प्रहरीले सोधपुछका लागि १० जनालाई बोलाए पनि अन्य ७ जनालाई सामान्य प्रश्नपछि छोडिएको थियो, भने तीन जनालाई भने छुट्टाछुट्टै कोठामा लगेर कुटपिट गरिएको दाबी गरिएको छ।
पीडितहरू अनुसार प्रहरीहरू ‘ट्रान्सफर्मर कसले चोर्यो ?’ भन्दै बल प्रयोग गरेका थिए। कुटपिटपछि डरले चुपचाप घर फर्किएका उनीहरूमध्ये नासिर मियाको स्वास्थ्य अवस्था गम्भीर बन्दै गएपछि उनलाई कोशी अस्पतालमा भर्ना गरिएको हो। अस्पताल स्रोतका अनुसार उनको टाउको र कानमा आन्तरिक चोट लाग्न सक्ने सम्भावनामा सिटी स्क्यान गरिएको छ, तर रिपोर्ट आउन बाँकी छ। अन्य दुई जनाको अवस्था सामान्य रहेको बताइएको छ।
जिल्ला प्रहरी कार्यालय मोरङकी प्रहरी प्रवक्ता डीएसपी कोपिला चुडालले घटनाबारे प्रारम्भिक जानकारीमात्रै प्राप्त भएको बताउँदै भन्नुभयो, “वास्तविक तथ्य बुझ्न हामी प्रारम्भिक अनुसन्धानको चरणमा छौं। दुबै पक्षसँग कुराकानीपछि यथार्थ बाहिर आउनेछ।”
घटनाले प्रहरीप्रतिको विश्वास र मानव अधिकारको सवाल उठाएको भन्दै स्थानीय तहमा चासो बढेको देखिन्छ।
